mail

Mail, m. monosyl. Vient du Latin Malleus. et signifie une massue à deux gros bouts plats, emmanchée en potence d'un manche moyennement long. L'instrument appelé Pallemail. que l'Italien dit, Pallemaglio. Estant le composé de ces deux, Palla, et Mail, donne assez à entendre la figure dudit mail, de la matiere duquel ne peut chaloir, soit fer, plomb, bois ou autre, pourveu que la figure y soit. De tel Mail, mesme estant de fer ou de plomb, usoient anciennement les François en la guerre, dont a esté fait le verbe Chamailler, qui vaut autant que frapper de tel mail, et le nom Chamaillis, qui signifie proprement le cliquetis dudit mail en combatant, et par translation le conflict, comme, Qui eust ouy le chamaillis des deux armées, il s'en fust estonné. Et, Qui eust veu le chamaillis des chevaliers, il eust dit qu'ils avoient grand'envie d'esprouver leur valeur et leurs forces.

Thresor de la langue françoyse. Jean Nicot.